Í skýrslunni er tæpt á hugsanlegum lausnum með svokölluðu geo-engineering sem minnir kannski einna helst á eitthvað úr vísindaskáldsögu. Þar er um að ræða tækni sem er hægt að nota til að draga úr áhrifum loftslagsbreytinga.
Hér verða nefndar til sögunnar nokkrar hugmyndir sem geta fallið undir þetta en virðast kannski jaðra við ákveðna klikkun, svo ótrúlegar eru þær.
Það eru mörg ár síðan vísindamenn viðruðu þær hugmyndir í fyrsta sinn að senda spegla út í geiminn til að endurkasta geislum sólarinnar. Meðal annars var stungið upp á því að senda milljarða af speglum 1,5 milljónir kílómetra út í geiminn þar sem jafnvægi ríkir á milli aðdráttarafls sólarinnar og jarðarinnar. Speglarnir áttu að endurvarpa um einu prósenti af geislum sólarinnar aftur út í geiminn þannig að þeir myndu ekki ná til jarðarinnar.
Vandinn við þetta er að það mun kosta mikla losun á koldíoxíði út í andrúmsloftið að senda alla þessa spegla út í geiminn, svo ekki sé talað um kostnaðinn.
Ein þeirra leiða sem IPCC hefur nefnt í skýrslum sínum er að gera gervieldfjöll. Hugmyndin er að senda brennisteinsagnir út í andrúmsloftið. Þessar agnir geta endurkastað hluta af geislum sólarinnar frá jörðinni og þannig lækkað hitann hér á jörðinni. Þetta er það sama og gerist þegar alvöru eldfjöll gjósa og senda mikið magn af brennisteinsögnum út í andrúmsloftið.
Vandinn við þetta er að vísindamenn vita ekki hvaða áhrif þetta hefur á andrúmsloftið annað en að þetta mun breyta því hvenær og hvar það rignir.
Fyrir tíu árum kynntu bandarískir vísindamenn til sögunnar hugmynd um „gervitré“ sem gætu sogið koldíoxíð úr andrúmsloftinu og gert það eins hreint og það áður en iðnbyltingin hófst. Koldíoxíðið er sogið úr loftinu með því að loftið fer í gegnum síu sem inniheldur basíska lausn sem leysir koldíoxíðið upp.
Vandinn við þetta er að þrátt fyrir að hugmyndin sé tíu ára þá hefur ekkert meira gerst á þessum tíu árum annað en að hugmyndin var sett fram. Ekki hafa verið settar fram neinar hugmyndir um hvernig á að hreinsa koldíoxíðið úr síunum og hvar á að geyma það.