Lögreglan í Mexíkó handtók á dögunum hjón í úthverfi Mexíkóborgar sem grunuð eru um hrottaleg morð. Að því er breska ríkisútvarpið, BBC, greinir frá hefur maðurinn játað að hafa myrt tuttugu konur.

Lögregla hafði fylgst með hjónunum í nokkurn tíma en það voru líkamsleifar í barnavagni sem komu lögreglu almennilega á sporið. Hjónin voru grunuð um að hafa rænt barni konu sem hafði horfið sporlaust. Þegar lögreglumenn kíktu ofan í vagninn blasti við hryllileg sjón; vagninn var fullur af líkamsleifum kvenna sem hjónin eru grunuð um að hafa myrt.

Lögregla framkvæmdi einnig leit á heimili þeirra og þar fundust fleiri líkamsleifar sem og í garði við heimilið.

Lögreglan í Mexíkóborg hefur sagt að hjónin séu grunuð um að hafa selt líkamsleifarnar, en hver kaupandinn var liggur ekki fyrir. Fórnarlömbin áttu það sameiginlegt að búa í Ecatepec, fátæku úthverfi Mexíkóborgar. Hjónin sitja nú í gæsluvarðhaldi meðan rannsókn stendur yfir. Þau eiga yfir höfði sér lífstíðarfangelsisdóm.