Gríska lögreglan rannsakar nú morð á tveimur konum og einni stúlku en lík þeirra fundust í gær við landamæri Tyrkalands og Grikklands. Hendur fórnarlambanna voru bundnar fyrir aftan bak og þær höfðu verið skornar á háls.
Líkin lágu nærri hvert öðru en tveir til þrír metrar voru á milli þeirra að sögn Pavlos Pavlidis læknis. Lögreglan hefur ekki enn skýrt frá hverjar konurnar og stúlkan eru en AP segir að þær hafi verið á aldrinum 15 til 35 ára. Reuters segir að þær hafi verið á aldrinum 15 til 25 ára og þar af hafi tvær verið yngri en 18 ára.
Haft er eftir Pavlidis að konurnar séu „Miðausturlandalegar eða norður-afrískar í útliti og að nú sé verið að rannsaka hvort þær hafi komið þaðan til Grikklands.
Það var bóndi sem fann líkin á bökkum Evros, sem er á sem aðskilur Tyrkland og Grikkland, nærri bænum Pragi.
Á þessu ári hafa um 10.000 flóttamenn komið frá Tyrklandi til Grikklands með því að fara yfir Evros en í heildina hafa um 24.000 flóttamenn komið til landsins það sem af er ári.