Sex ára breskur drengur varð fyrir miklum heilaskaða eftir fæðingu og er mikið fatlaður. Hann er með lélega sjón, á erfitt með mál, glímir við hegðunarvanda og á almennt erfitt með hreyfingu. Honum hafa nú verið dæmdar bætur vegna þeirra mistaka sem heilbrigðisstarfsfólk gerði og urðu þess valdandi að hann er svona mikið fatlaður. Drengurinn fær sem nemur 5,6 milljörðum íslenskra króna í bætur.

BBC skýrir frá þessu. Drengurinn smitaðist af Herpes Simplex vírusnum á Watford General sjúkrahúsinu. Starfsfólki yfirsást þetta og því hófst meðhöndlun tveimur dögum of seint og því fór sem fór.

Þetta er hæsta upphæð sem breska heilbrigðiskerfið hefur greitt í bætur en þótt sumum þyki upphæðin kannski há þá er rétt að hafa í huga að henni er ætlað að standa undir þeim kostnaði sem fyrirsjáanlegur er í framtíðinni þar sem drengurinn mun þurfa aðstoð allan sólarhringinn allt sitt líf.