Köngulóartegund sem sögð er sú hættulegasta á Bretlandseyjum er í miklum blóma þessa dagana og herjar víða í landinu. Yfirvöld hafa gripið til þess ráðs að loka sjö skólum í austurhluta Lundúnaborgar vegna mikils fjölda köngulóa af þessari tegund í húsnæði skólanna. Tegundin heitir Steatoda nobilis á latínu en er í daglegu tali nefnd ”fölsk ekkja”.

BBC skýrir frá þessu. Lokanirnar hafa áhrif á mörg þúsund nemendur en þeir yngstu fá þó kennslu annarsstaðar á meðan unnið er að því að leita að köngulóm og fjarlægja þær úr skólabyggingunum.

Falska ekkjan er sögð frekar friðsöm og bíti ekki fólk nema hún verði hrædd, sé ögrað eða komist í vandræði. Bit hennar getur valdið einkennum sem líkjast inflúensu og bólgum ef ekki er brugðist hratt við. Það getur einnig verið banvænt en það er þó sjaldgæft að fólk látist af völdum bits köngulóa af þessari tegund.