Fjórir karlar voru skotnir til bana og sá fimmti særður í barnaafmæli í Texas í Bandaríkjunum síðdegis á laugardaginn. Til deilna kom í afmælinu sem enduðu með þessum ósköpum. Hinir látnu eru á aldrinum 20 til 62 ára og er sá elsti afi hinna yngri.

Þetta gerðist í bænum Taft í San Patricio sýslu. Þegar lögreglumenn komu á vettvang um klukkan 17 fundu þeir hina látnu í bakgarði hússins. Lögreglan hefur ekki viljað upplýsa um hvað var deilt sem varð til þess að fjórmenningarnir voru skotnir til bana.

Tvítugur maður var handtekinn vegna málsins og 37 ára faðir hans er einnig grunaður um aðild að því en hefur ekki verið handtekinn.

Taft er lítill bær en þar búa um 3.000 manns og eins og nærri má geta er íbúum mjög brugðið vegna málsins.