Todd Harrell, fyrrverandi bassaleikari rokksveitarinnar 3 Doors Down, hefur verið dæmdur í tíu ára fangelsi. Harrell var einn af stofnendum sveitarinnar sem naut mikilla vinsælda upp úr aldamótum.

Meðal þekktustu laga sveitarinnar eru Kryptonite og Here Without You.

Todd var meðlimur sveitarinnar á árunum 1996 til 2013 en hann var dæmdur í fangelsi á dögunum fyrir vopnalagabrot. Það var í júní síðastliðnum að lögreglan var kölluð að heimili hans. Eiginkona hans sagði að þau hefðu rifist og Todd beitt hana líkamlegu ofbeldi.

Þegar lögreglan kom á vettvang komu lögregluþjónar auga á skotvopn og fíkniefni í íbúðinni. Þar sem Todd var á sakaskrá fyrir að verða valdur að banaslysi í umferðinni árið 2013 mátti hann ekki hafa skotvopn undir höndum. Var hann því ákærður fyrir ólöglegan vopnaburð og ákvað dómari í málinu að dæma Todd til hámarksfangelsisvistar, eða tíu ár bak við lás og slá.