Rifrildi í afmæli eins árs barns enduðu með dauða fjögurra einstaklinga í bænum Taft, skammt norður af Corpus Christi í Texas í Bandaríkjunum.

Afmælið var haldið síðdegis á laugardag. Skyndilega fóru nokkrir gestir að rífast heiftarlega og endaði það með því að tvítugur maður dró upp byssu og skaut fimm manns. Fjórir voru úrskurðaðir látnir og einn var fluttur slasaður á sjúkrahús.

Ekki liggur fyrir um hvað rifrildið snerist en mennirnir, það er grunaður byssumaður og fórnarlömbin, eru tengd fjölskylduböndum. Fórnarlömbin voru 20 ára, 22 ára, 25 ára og 62 ára. Sá sem fluttur var slasaður á sjúkrahús er 43 ára.