Fyrir tveimur mánuðum breyttist líf hins 85 ára gamla Wendall Gill þegar eiginkona hans til 68 ára, Della Gill, heimsótti hann í vinnuna. Wendall hefur starfað á veitingastað McDonald’s í Lexington í Kentucky í Bandaríkjunum í um 40 ár.
Þegar Della heimsótti hann í einu hádegishléinu í ágústmánuði brá hún sér á salerni staðarins. Þar hneig hún niður og leiddi rannsókn í ljós að hún hafði fengið slagæðagúlp. Della lést á sjúkrahúsi skömmu síðar.
Wendall ræddi atvikið í viðtali við Washington Post fyrir skömmu þar sem hann sagði meðal annars: „Það er sagt að maður geti komist yfir svona hluti, en þegar ég hugsa um hana þá fer ég að gráta. Ég held ég muni aldrei jafna mig.“
Þau hjónin höfðu hugsað um tvö barnabörn sín mörg undanfarin ár en svo vill til að báðir eru með sérþarfir. Nú er Wendall eina fyrirvinnan á heimilinu, orðinn 85 ára, og þarf auk þess að hugsa um barnabörnin tvö.
Það var svo ekki alls fyrir löngu að Michael Todd Oldfield, sem kynntist Gill árið 1978 þegar hann vann á þessum sama veitingastað sem unglingur, gekk inn á staðinn og spurði Wendall hvernig hann hefði það. „Hann byrjaði að segja mér þessa sögu og hann brotnaði strax saman,“ segir hann.
Michael ákvað því að stofna síðu á vefnum GoFundMe þar sem hann biðlaði til fólks að koma Wendall til aðstoðar. Óhætt er að segja að margir hafi tekið vel í þessa beiðni því nú þegar hafa 77 þúsund dollarar safnast, rúmar níu milljónir króna. Mun peningurinn eflaust nýtast þessum aldna höfðingja vel sem þarf að meðal annars að borga af húsnæðisláni sínu og sjá fyrir heimilinu.