Risastórt uppblásið líkan af ristli mannfólks var stolið. Ristillinn er í eigu Háskólans í Kansas í Kansas City í Kansas í Bandaríkjunum. Hann er notaður af læknadeild skólans til að kenna gestum og gangandi um hvernig ristillinn virkar í okkur öllum.
Það átti að sýna ristilinn í almenningsgarði í Kansas City um helgina og var hann geymdur samanbrotinn aftan í pallbíl þaðan sem honum var stolið. Ristillinn er mjög stór þegar hann er uppblásinn, rúmlega þriggja metra hár. Hann er metinn á hálfa milljón krónur.
„Að fara í skoðun er besta leiðin í baráttunni gegn ristilkrabbameini,“ segir John Ashcraft, krabbameinslæknir við Háskólann í Kansas í yfirlýsingu. „Það getur verið erfitt að tala við fólk um ristilkrabbamein og því er þessi risastóri ristill mjög góð leið til að hefja samræðurnar.“