Svo gæti farið að nýtt sjálfstætt ríki líti dagsins ljós á næstunni því á sunnudag munu íbúar Nýju-Kaledóníu, eyjaklasa í Suðvestur-Kyrrahafi, ganga til atkvæðagreiðslu um sjálfstæði.
Nýja-Kaledónía er frönsk nýlenda og eru íbúar um 270 þúsund talsins. Eyjarnar eru um 1.200 kílómetra austan við Ástralíu og 1.500 kílómetra norðaustan við Nýja-Sjáland.
Efnahagskerfi Nýju-Kaledóníu er þokkalega stöðugt en misskipting mikil. Eyjarnar fá talsverðan stuðning frá Frakklandi, eða sem nemur fimmtán prósentum af árlegri landsframleiðslu.
Meðal annars af þessum sökum hafa skoðanakannanir bent til þess að íbúar muni kjósa með því að vera áfram hluti af Frakklandi.