Niðurstöður nýrrar rannsóknar sýna að neysla súkkulaðis getur aukið kynhvöt fólks og bætt frammistöðu karla í kynlífinu. Vísindamenn sprautuðu prótíni, sem er í súkkulaði, í karla og fengu þá síðan til að horfa á klám. Þetta hafði þau áhrif að þeir örvuðust meira við klámáhorfið en ef þeir fengu ekki prótín.
Það var prótínið kisspeptin sem vísindamenn hjá Imperial College London sprautuðu í mennina. Niðurstaða þeirra var að efnið breytir virkni ákveðinna heilastöðva sem eru taldar stýra kynhvötinni.
Fjallað er um málið á vef Science Daily. Alexander Comninos, aðalhöfundur rannsóknarinnar, sagði að niðurstöðurnar geti orðið til að opna fyrir notkun kisspeptin í framtíðinni gegn lítilli kynhvöt sem geti haft alvarlegar afleiðingar á sambönd fólks.
Það verður þó að taka niðurstöðunum með þeim fyrirvara að aðeins 29 manns tóku þátt í henni og því er ekki hægt að alhæfa um niðurstöðurnar. Stærri rannsókn þarf að koma til áður en hægt verður að fullyrða hvort þetta eigi við rök að styðjast.