Sannkallaður harmleikur átti sér stað í suðvesturhluta Kína fyrir skemmstu þegar rútubílstjóri missti stjórn á bifreið sinni með skelfilegum afleiðingum. Bifreiðin fór fram af brú og létust alls fimmtán í slysinu.

Það tók kínversk yfirvöld ekki ýkja langan tíma að finna ástæður slyssins þar sem öryggismyndavél var í bifreiðinni. Á henni má sjá þegar farþegi í bifreiðinni, ung kona, vindur sér upp að bílstjóranum og lætur fúkyrðum rigna yfir hann. Hún slær hann svo í andlitið með óþekktum hlut og örskömmu síðar missir bílstjórinn stjórn á bifreiðinni.

Slysið varð þann 28. október síðastliðinn og virðist konan hafa verið ósátt við að bílstjórinn stöðvaði ekki rútuna á þeim stað sem hún vildi. Búið er að ná líkum þrettán einstaklinga upp úr ánni fyrir neðan en tveggja er enn saknað. Talið er að allir um borð hafi látist í slysinu.