Dómstóll í Queensland í Ástralíu hefur dæmt hinn 69 ára Graham Robert Morant í tíu ára fangelsi fyrir að hvetja og aðstoða eiginkonu sína, Jennifer, við að fremja sjálfsvíg. Þetta gerði hann til að fá líftryggingu hennar greidda og til að geta byggt neðanjarðarbyrgi þar sem hann taldi að heimsendir væri í nánd.
Graham, sem er mjög trúaður og sjálfskipaður prestur, er sá fyrsti sem dæmdur er í Ástralíu í máli sem þessu. Eiginkona hans, Jennifer Morant, framdi sjálfsvíg árið 2014. Hún var 56 ára.
Jennifer hafði lengi glímt við veikindi, meðal annars þunglyndi, kvíða og þráláta bakverki.
Dómari í málinu dæmdi Graham sem fyrr segir í tíu ára fangelsi og sagði hann hafa stjórnast af græðgi. Hann hafi haft fjárhagslegan ávinning af láti eiginkonu sinnar og fært veikindi hennar sér í nyt.
Saksóknarar í málinu höfðu farið fram á 10-14 ára fangelsi.
