41 árs karlmaður frá Haslev í Danmörku var í gær úrskurðaður í tveggja vikna gæsluvarðhald. Maðurinn er grunaður um að hafa beitt eins árs dreng grófu ofbeldi, þar á meðal að hafa kastað honum í jörðina af öxlum sér og lenti drengurinn á andlitinu.

Þetta gerðist síðdegis á laugardaginn en þá hafði maðurinn verið á gangi með drenginn í töluverðan tíma og hafði reynt að selja hann. Maðurinn var þá ber að ofan og berfættur og vakti að vonum athygli nærstaddra. Vitni segja að hann hafi haldið í annan fót drengsins og gengið þannig um með hann og hafi margoft misst hann.

Drengurinn var fluttur á sjúkrahús en reyndist ekki hafa meiðst alvarlega. Maðurinn var eins og fyrr segir úrskurðaður í gæsluvarðhald og var í framhaldi vistaður á lokaðri réttargeðdeild í Hróarskeldu.