Lögreglan í Sussex á Englandi hóf síðdegis í gær umfangsmikla leit að lítilli stúlku sem óttast var að hefði verið rænt á götu úti. Myndir úr eftirlitsmyndavélum sýndu karlmann ræða við litlu stúlkuna og ganga á brott með henni. Þyrlur voru notaðar við leitina, lögreglan leitaði í bílum við verslunarmiðstöð og lögreglumenn gengu hús úr húsi. Allt hófst þetta eftir að vitni höfðu samband við lögregluna og sögðust telja að stúlkunni hefði verið rænt. Myndir úr eftirlitsmyndavélum studdu við þetta.
Litla stúlkan og maðurinn á gangi.
Lögreglan birti myndir úr eftirlitsmyndavélum og setti allt tiltækt lögreglulið í málið. Það var síðan upp úr miðnætti í nótt sem lögreglan skýrði frá því að málið væri leyst. Stúlkan væri steinsofandi heima hjá sér og ekkert hefði komið fyrir hana. Þetta var eftir að faðir hennar setti sig í samband við lögregluna eftir að hann sá myndirnar úr eftirlitsmyndavélunum. Það var hann sem var á myndunum með stúlkunni, sem er þriggja ára, en hún var ekki fús til að fara heim þegar myndirnar voru teknar og vitnin sáu til þeirra.
