Andrew Urdiales, bandarískur raðmorðingi, fannst látinn í fangaklefa sínum á dauðadeild San Quentin-fangelsisins í Kaliforníu. Urdiales þessi hafði þrisvar verið dæmdur til dauða, síðast í október síðastliðnum. Fangelsisyfirvöld telja að hann hafi svipt sig lífi.
Urdiales var fyrst dæmdur til dauða árið 2003 fyrir tvö morð í Illinois. Dómnum var breytt í lífstíðarfangelsi árið 2003 eins og aðrir dauðadómar sem kveðnir höfðu verið upp í ríkinu.
Urdiales kom svo aftur fyrir dóm árið 2004 vegna þriðja morðsins og þá hlaut hann dauðadóm. Hann var svo framseldur til Kaliforníu árið 2011 vegna morða sem hann hafði framið þar. Það ár voru dauðadómar felldir alveg úr gildi í Illinois og því fóru yfirvöld í Kaliforníu fram á að fá hann framseldan.
Í október síðastliðnum var þriðji dauðadómurinn yfir honum kveðinn upp og var hann vegna morða á fimm konum í ríkinu á árunum 1986 til 1995.
Tony Rackauckas, saksóknari Orange County, sagði í yfirlýsingu að Urdiales væri heigull. Hann hefði rænt aðstandendur þeirra sem hann myrti réttinum til að vera viðstaddir fullnustu refsingarinnar.