Viðskiptavinir flugfélagsins Ryanair voru margir hverjir óhressir þegar tilkynnt var að rukkað yrði fyrir allan handfarangur um borð í vélum félagsins. Lee Cimino, sem hefur reglulega flogið með Ryanair – og kveðst meira að segja vera aðdáandi – ákvað að athuga hvort hann kæmist upp með að fara framhjá þessum reglum. Myndband af tilraun hans hefur vakið talsverða athygli.
„Ég elska Ryanair en mér finnst þessi nýja gjaldtaka ganga svolítið langt,“ segir hann við Press Association.
Lee útbjó sérstakan frakka með nógu mörgum hólfum til að handfarangurinn yrði óþarfur með öllu. Hann hélt svo á flugvöllinn í Manchester þar sem hann átti bókað flug til Belfast. Það er skemmst frá því að segja að tilraun Lee tókst fullkomlega og komst hann um borð í vélina án þess að fá athugasemd.
Lee segir að myndbandinu hafi verið vel tekið. „Sumir segja að ég sé nískur en það er ekki þannig. Ég hef ekkert á móti Ryanair en ég vildi bara vekja athygli á þessu,“ segir hann.
Forsvarsmenn Ryanair hafa sagt að nýja gjaldið muni auka skilvirkni á flugvöllum og gera allt ferlið hraðvirkara.