Margir hafa eflaust stundum velt því fyrir sér hvað gerist heima hjá þeim þegar þeir eru ekki heima og þá sérstaklega ef gæludýr eru til staðar. Eirik Larsen, 30 ára, hafði einmitt velt þessu fyrir sér og ákvað dag einn að setja eftirlitsmyndavél upp svo hann gæti séð hvað hundurinn hans var að gera þegar hann var einn heima.

Hann kom vélinni fyrir í svefnherberginu. Síðan fékk hann þá hugmynd að hafa kveikt á henni að næturlagi til að sjá hvað gerðist á meðan hann svæfi.

Eirik eignaðist hundinn Leo í nóvember á síðasta ári og hefur sambýli þeirra gengið mjög vel. Í samtali við TV2 sagði Eirik að hann hafi vitað að Leo væri á ferðinni á nóttinni og færði sig á milli staða en hann hafi ekki grunað að hann kæmi upp í rúm til sín.

Hann varð því hissa og nokkuð skemmt þegar hann skoðaði myndir úr eftirlitsmyndavélinni og sá hvað Leo var að gera á nóttinni og áttaði sig á að hann sefur ekki einn í rúminu. Það er að minnsta kosti ljóst að Eirik sefur mjög fast.

Hann birti myndirnar í Facebookhópnum „Hund på Facebook“ þar sem fólk tók þeim vel og heillaðist af Leo og uppátækjum hans.