Íbúum á Jan Mayen brá illa í brún klukkan 2.49 að staðartíma í nótt þegar öflugur jarðskjálfti reið yfir eyjuna. Skjálftinn mældist 6,8 að styrkleika og átti upptök sína 125 kílómetra norðvestan við eyjuna. Engin meiðsl urðu á fólki.

Á eyjunni dvelja 18 manns, 14 á vegum norska hersins og 4 á vegum norsku veðurstofunnar. Allir vöknuðu við skjálftann enda ekki hversdagslegur viðburður að jörð skjálfi svo kröftuglega á Jan Mayen.

Norska ríkisútvarpið segir að skjálftinn sé sá öflugasti sem mælst hefur á norsku yfirráðasvæði en gamla metið var einnig frá Jan Mayen en þar mældist skjálfti upp á 6,6 í lok ágúst 2012. Þá meiddist enginn en eitthvað var um eignatjón.

Silje Wennesland, sem er á eyjunni, segir að ekki sé búið að kanna hvort skemmdir hafi orðið, það verði gert þegar bjart verður orðið á milli klukkan 10 og 11.

Jan Mayen er á heimsskautasvæðinu og hefur verið hluti af Noregi síðan 1930. Þar dvelja aðeins starfsmenn hersins og veðurstofunnar.