Töluverður fjöldi báta eða lítilla skipa hefur fundist á reki í japanskri landhelgi undanfarin misseri. Þetta væri varla í frásögur færandi nema fyrir þær sakir að skipin eru stundum mannlaus og stundum með látnum skipverjum um borð.
Það sem af er þessu ári hafa 95 slík skip fundist í japanskri landhelgi eða við strendur landsins. Líkamsleifar tólf einstaklinga, oft lítið annað en beinagrindur, hafa fundist. Allt árið í fyrra fundust 104 slík skip.
Talið er fullvíst að flest þessara skipa eigi rætur sínar að rekja til Norður-Kóreu. Þau eru ekki búin fullnægjandi öryggis- eða staðsetningarbúnaði og því auðvelt að villast af leið.
Í frétt AP kemur fram að japönsk yfirvöld hafi aukið eftirlit í landhelgi sinni til að stemma stigu við þessum aukna fjölda á undanförnum árum.