19 ára norsk kona hefur verið ákærð fyrir tvær nauðganir en þær eru báðar sagðar hafa verið grófar og voru fórnarlömbin karlmenn. Í október á síðasta ári var konan dæmd í tveggja ára fangelsi fyrir að hafa nauðgað karlmanni í Svíþjóð. Við rannsókn þess máls komst lögreglan á snoðir um annað nauðgunarmál sem átti sér stað í Eidskog í Noregi.

VG skýrir frá þessu. Réttarhöld í því máli hófust í gær í Noregi. Konan er ásamt þremur karlmönnum ákærð fyrir að hafa beitt karlmann á þrítugsaldri grófu kynferðisofbeldi þegar þau voru í samkvæmi í Eidskog. Þau eru sögð hafa ráðist á mannin og misþyrmt honum með kústskafti. Á meðan á því stóð nauðgaði konan karlinum samkvæmt ákæruskjali.

Konan játar sök í málinu en meintir samverkamenn hennar neita sök.