Þann 11. nóvember síðastliðinn komu lágtíðnihljóð, drunur, fram á mælum jarðvísindamanna víða um heiminn. Hljóðin komu meðal annars fram á mælum í Kanada, Nýja-Sjálandi, Chile, Hawaii og á Madagascar. Upptök þeirra voru síðar rakin til hafsvæðis í um 20 km fjarlægð frá frönsku eyjunni Mayotte sem er í Indlandshafi. Vísindamenn vita ekki hver upptök hljóðanna voru en þau minna helst á hljóðin sem fylgja jarðskjálftum en engir stórar skjálftar voru þegar hljóðin komu fram á mælum.

Getgátur hafa verið uppi um að eldgos neðansjávar hafi valdið þeim eða kvikuflæði en þetta eru bara getgátur og vísindamenn eru í raun litlu nær um uppruna hljóðanna.

National Geographic hefur eftir Göran Ekström, jarðskjálftafræðingi hjá Columbia háskólanum, að hann hafi líklegast aldrei séð neitt þessu líkt. Hann tók einnig fram að það þýddi ekki endilega að upptök hljóðanna væru svo sérstök.

Sérfræðingar og áhugafólk um jarðvísindi hefur rætt málið mikið sín á milli og þar með á samfélagsmiðlum og hafa margir lýst undrun sinni á þeim.

Vísindamenn eru nú að reyna að komast að hvað orsakaði þessi hljóð en eru litlu nær enn sem komið er. Vísindamenn hjá frönsku jarðfræðistofnuninni segja að hugsanlega hafi hljóðið myndast þegar kvika færði sig nær yfirborðinu.