Ef nýkjörin ríkisstjórn Lúxemborg stendur við kosningaloforð sín verða allar almenningssamgöngur í ríkinu ókeypis áður en langt um líður. Vonast er til að með þessu muni létta verulega á bílaumferð í smáríkinu sem er mjög mikil.

Breska blaðið Guardian fjallar um þetta.

Xavier Bettel, forsætisráðherra þessa landlukta smáríkis í Vestur-Evrópu, lofaði því áður en kosningarnar fóru fram að gera almenningssamgöngur fríar ef hann hlyti brautargengi í kosningunum. Þetta á við um strætisvagna, lestar og sporvagna.

Umferðaröngþveitið í höfuðborginni er mikið en þar búa um 110 þúsund manns. Um 400 þúsund manns ferðast þó til borgarinnar á hverjum degi, meðal annars til að stunda vinnu. Samkvæmt könnun sem framkvæmd var ekki alls fyrir löngu eyddi meðalmaðurinn um 33 klukkustundum í umferðarteppum árið 2016. Þetta er vitanlega fyrir utan hefðbundinn ferðatíma sem getur numið nokkrum klukkustundum hvern dag.

Þeir sem nýta sér almenningssamgöngur borga nú tæpar 300 krónur fyrir ferðalög sem taka tvær klukkustundir eða minna. Einstaklingar undir 20 ára greiða ekkert. Enn á eftir að ákveða nákvæma útfærslu á fyrirkomulaginu en stefnt er að því að breytingin taki gildi eigi síðar en árið 2020.