Eflaust hafa margir upplifað að klósett stíflast. Hvað á þá til bragðs að taka? Það er eflaust ákveðinn léttir ef ekki þarf að kalla pípulagningarmann á staðinn því flestir ættu að geta leyst vandann sjálfir á einfaldan hátt.

Í umfjöllun Expressen segir að einfaldasta ráðið til að losa stífluna sé að hita fjóra lítra af vatni (ekki láta það sjóða). Helltu að minnsta kosti einum desilítra af uppþvottalegi í klósettið. Helltu síðan heita vatninu hægt og rólega í klósettið. Það geta síðan liðið 15 mínútur þar til stíflan losnar. Ef hún losnar ekki skaltu endurtaka ferlið. En ef stíflan losnar ekki eftir það er rétt að fara að finna símanúmer hjá pípulagningarmanni og fá aðstoð.