Í tæp 70 ár lifði Genevieve Purinton í þeirri trú að dóttirin sem hún fæddi árið 1949 hefði látist skömmu eftir fæðingu. Það var svo á dögunum að hið ótrúlega gerðist. Purinton hitti dóttur sína sem hafði hreint ekki látist eins og talið var.
Purinton var 18 ára þegar hún fór á fæðingardeild sjúkrahúss í Indiana í Bandaríkjunum árið 1949. Hún fæddi stúlkuna stuttu síðar. „Ég spurði hvort ég mætti sjá hana en þau sögðu mér að hún væri látin, það er allt sem ég man,“ segir hún en tekur fram að hún hafi aldrei fengið neitt dánarvottorð í hendurnar.
Purinton er 88 ára í dag og varð henni ekki barna auðið eftir þetta.
Löngu síðar kom í ljós að dóttir Purinton hafði ekki látist heldur hafði hún verið gefin til ættleiðingar skömmu eftir fæðingu. Hjá hinni nýju fjölskyldu var stúlkunni gefið nafnið Connie Moultroup. Móðir hennar, sem ættleiddi hana, lést þegar Connie var fimm ára. Faðir hennar kynntist annarri konu sem var ofbeldisfull og var líf Connie enginn dans á rósum þegar hún var barn.
Í frétt NBC kemur fram að Connie hafi síðar fengið að vita að hún hefði verið ættleidd. Viðurkennir hún að hún hafi átt sér þann draum að finna blóðmóður sína. Lengi vel var ekki útlit fyrir að það tækist enda ekki ýkja langt síðan DNA-tæknin var allt að því fullkomnuð.
Connie og dóttir hennar, Bonnie Chase, prófuðu að senda DNA-sýni úr Connie til ættfræðisíðunnar Ancestry.com skömmu eftir síðustu jól. Niðurstöðurnar gáfu uppruna Connie gróflega til kynna; hún fann nokkur náskyld frændsystkini og að lokum fann hún blóðmóður sína, Purinton.
Þær mæðgur hittust svo á dögunum og er óhætt að segja að miklir fagnaðarfundir hafi orðið. „Ég er ekki látin,“ sagði Connie við móður sína. Purinton er eðli málsins samkvæmt í sjöunda himni með fréttirnar þó hún hafi misst af ótal mörgu á þeim tæpu sjötíu árum sem liðin eru.
Ekki nóg með að vera orðin móðir á nýjan leik, ef svo má segja, er Purinton einnig allt í einu orðin amma og langamma. „Ég held að sjálfur jólasveinninn gæti ekki toppað þetta,“ segir Connie í samtali við fréttavef Yahoo.
