Þetta segir bandaríska goðsögnin Carl Bernstein, blaðamaður, sem átti stóran þátt í að koma upp um Watergate-hneykslið í byrjun áttunda áratugarins en það mál varð Richard Nixon, forseta, að falli og neyddist hann til að segja af sér embætti. Bernstein lét þessi orð falla í viðtali við Vanity Fair.
Ástæðan fyrir þessum áhyggjum Trump er augljós að mati Bernstein. Eftir 18 mánaða rannsókn Robert Mueller, sérstaks saksóknara, á hugsanlegum brotum Trump og forsetaframboðs hans eru línur farnar að skýrast.
Yfirheyrslur yfir Michael Coen, fyrrum lögmanni Trump, hafa leitt í ljós að Trump gaf honum fyrirmæli um að greiða klámmyndaleikkonunni Stormy Daniels sem svarar til um 18 milljóna íslenskra króna fyrir að skýra ekki frá meintu ástar/kynlífssambandi hennar við Trump. Daniels hefur haldið því fram að þau hafi átt í kynferðislegu sambandi. Henni var greitt fyrir að segja ekki frá þessu því Trump taldi að það myndi skaða forsetaframboð hans. Ef þetta er rétt er þetta brot á bandarískum kosningalögum.
Adam Schiff, demókrati og verðandi formaður leyniþjónustunefndar fulltrúadeildarinnar, segir að þetta geti verið brot á alríkislögum.
„Hann (Donald Trump, innskot blaðamanns) er fyrsti forsetinn í langan tíma sem er hugsanlegt að endi í fangelsi.“
Sagði Schiff í samtali við CNN.
Jarry Nadler, verðandi formaður dómsmálanefndar fulltrúadeildarinnar, er sama sinnis.
„Dómsskjölin, sem voru lögð fram á föstudaginn, eru sönnun þess að Donald Trump er miðpunktur umfangsmikils svindls. Þetta eru afbrot sem gefa tilefni til ríkisréttar.“
En margir efast um að hægt verði að draga Trump fyrir ríkisrétt á meðan hann er forseti. Hins vegar eru margir þeirrar skoðunnar að hægt verði að sækja hann til saka um leið og hann lætur af forsetaembætti sem verður í janúar 2021 ef hann nær ekki endurkjöri.
En Jennifer Rubin, repúblikani og pistlahöfundur hjá Newsweek, telur að Trump eigi inni sterkan leik til að koma í veg fyrir það.
„10 mínútum áður en forsetatíð hans lýkur 2021 mun Trump segja af sér embætti. Þá verður Mike Pence, varaforseti, forseti. Á síðustu mínútum valdatíma síns getur hann náðað Trump til að koma í veg fyrir að hann lendi í fangelsi.“
Segir hún í pistli í Newsweek.
En framtíðin ein mun leiða í ljós hvernig þetta mál endar.