Hvernig myndi það hljóma að búa einn, jafnvel með vini eða maka, á einskonar búgarði á lítilli paradísareyju í San Francisco-flóa? Eflaust hljómar það ágætlega en hvernig myndi það hljóma að fá rúmar fimmtán milljónir króna á ári fyrir það? Eflaust enn betur.
Yfirvöld í San Francisco hafa nú auglýst eftir einstaklingi, eða einstaklingum, sem eru tilbúnir að taka að sér að vera vitaverðir á lítilli eyju í San Francisco-flóa. Eyjan er í um tíu mínútna siglingafjarlægð frá höfninni í San Francisco en vitinn á eyjunni hefur gegnt mikilvægu hlutverki frá síðari hluta 19. aldar.
Che Rodgers og Jillian Meeker hafa starfað á eyjunni undanfarin ár en þau láta brátt af störfum. Þó að viti sé á eyjunni hefur starf þeirra sem þar dvelja breyst nokkuð á undanförnum árum og áratugum. Þeir sem þar starfa eru kannski ekki eiginlegir vitaverðir eins og þekktist fyrr á öldum.
Í umfjöllun San Francisco Chronicle er starfinu lýst sem sannkölluðu draumastarfi en lítil ferðaþjónusta er rekin á eyjunni, svokallað bed & breakfast. Þeir sem koma til starfa á eyjunni geta því ekki bara legið með tærnar upp í lofti heldur þurfa þeir að sinna ýmsum verkefnum; eldamennsku, þrifum og sækja ferðamenn sem heimsækja eyjuna.
Fyrir rúmar fimmtán milljónir króna, ókeypis húsnæði og ókeypis mat gæti þetta þó verið draumastarfið enda eyjan róleg og í einstöku umhverfi.