Í umfjöllun Danska ríkisútvarpsins um málið var rætt við Poul Jørgen Jennum prófessor í taugafræði og yfirlæknis á svefnlæknisdeild danska ríkissjúkrahússins. Hann segir að það sé bara gömul mýta að ekki megi vekja svefngengla.
„Þú mátt alveg vekja svefngengla. Ef þeir eru að fara að hoppa út um glugga er betra að vekja þá en láta þá halda áfram.“
Hann segir að dæmi séu um að svefngenglar hafi slasast þegar þeir yfirgáfu heimili sín eða hoppuðu út um glugga en það sé sjaldgæft að slíkt gerist. Það sé því engin hætta á ferðum ef svefngengillinn er ekki að gera neitt hættulegt.
Jennum segir að þegar fólk sofnar þá slökkni ekki bara á heilanum. Hann sé með ákveðin eftirlitskerfi sem eru í gangi þrátt fyrir að fólk sofi. Það þurfi að geta brugðist við hættu á borð við eldsvoða nú eða ef barn grætur.
Þessi starfsemi heilans á meðan sofið er gerir það einnig að verkum að fólk getur bylt sér í svefni en þá opnar heilinn fyrir hreyfinga-svæði sitt. Ef það opnast of mikið getur fólk gengið í svefni. Hann segir að það sé yfirleitt hættulaust að ganga í svefni en stundum geti ákveðnir sjúkdómar tengst þessu, til dæmis flogaveiki.