Fæðingartíðni í Kína hefur aldrei verið lægri samkvæmt tölum frá kínverskum stjórnvöldum. Settar voru strangar reglur varðandi barnsfæðingar árið 1979 í landinu. Samkvæmt þeim reglum mátti fólk í borgum landsins eingöngu eignast eitt barn. Þessari stefnu var breytt árið 2016 en það virðist ekki hafa þau áhrif sem kínversk stjórnvöld bjuggust við. Í Kína eignast hver kona að meðaltali 1,6 barn á meðan á Íslandi er það um 1,9 barn á hverja konu.
Segja stjórnvöld að þau hafi engar skýringar fyrir þessu falli á fæðingartíðni í landinu, en samkvæmt rannsóknum bendir margt til þess að margir Kínverjar telja sig einfaldlega ekki hafa efni á því að eignast börn. Sérfræðingar benda á að með þessari áframhaldandi lækkun geti svo farið að Kínverjum byrji að fækka um árið 2027.
