Þegar geimfararnir í Apollo 14 sneru aftur til jarðarinnar eftir lendingu á tunglinu árið 1971 tóku þeir stóran stein, sem hefur verið nefndur „Big Bertha“ (Stóra Bertha) með sér heim. Steinninn vegur níu kíló og er á stærð við körfubolta. Hann er að mestu dökkur en smá hluti hans er ljóslitur og minnir á granít. Þessi hluti vegur aðeins tvö grömm og hafa vísindamenn nýverið rannsakað hann sérstaklega.

Niðurstöður þeirra, sem hafa verið birtar í Earth and Planetary Science Letters, sýna að steinninn er hugsanlega fjögurra milljarða ára gamall og að miklar líkur séu á að hann hafi orðið til á jörðinni.

Í steininum fannst steinefnið sirkon en það er hart og sterkbyggt steinefni sem inniheldur ummerki eftir ævaforn jarðfræðileg ferli. Vísindamennirnir komust að þeirri niðurstöðu að sirkonið í steininum hafi myndast við aðstæður sem ekki passa við þær sem eru á tunglinu. Sirikon myndast í miklu kaldari og súrefnisríkari bergkviku en er á tunglinu.

Ef þetta steinbrot myndaðist á tunglinu hefur það gerst á 170 km dýpi vegna þess þrýstings sem það hefur orðið fyrir. Það er því niðurstaða vísindamannanna að steinbrotið hafi myndast á jörðinni og þá á aðeins 20 km dýpi.