Kötturinn Fluffy lenti í miklum hremmingum í lok janúar. Hann var úti að þvælast, svona eins og kettir eiga til að gera, en veðrið var ekki upp á sitt besta. Hann fannst lífvana í snjóskafli í Montana í Bandaríkjunum. 13 stiga frost var þegar hann fannst og var Fluffy þakinn snjó og ís.

Farið var með hann til næsta dýralæknis. Dýralæknirinn, Jevon Clar, segir að ekki hafi verið hægt að mæla líkamshita Fluffy en mælirinn sýnir ekki minna en 32 gráður. Líkamshiti katta er að jafnaði 38 gráður.

En Clar vildi ekki afskrifa Fluffy og hitaði hann upp með því að vefja hann inn í teppi og láta heitt vatn leika um líkamann. Fluffy var síðan lagður inn á „gjörgæslu“.

Smátt og smátt tók hann að taka við sér og ná heilsu og gat að lokum farið heim til eigenda sinna á nýjan leik eftir því sem segir á Facebooksíðu dýralæknisins.