Lögreglumenn í Texas í Bandaríkjunum gerðu óhugnanlega uppgötvun í hlöðu í norðurhluta ríkisins á þriðjudaginn. Inni í henni fundu þeir tvö börn í læstu hundabúri og auk þeirra voru tvö börn til viðbótar í hlöðunni. Börnin eru á aldrinum eins til fimm ára. Öll voru þau soltin og þyrst og útötuð í saur og þvagi.

Lane Akin, lögreglustjóri í Wise sýslu, sagði að öll börnin hafi verið hungruð og þyrst þegar lögreglumenn komu á vettvang. Búið hafi verið að innrétta hlöðuna sem lélegt gamaldags heimili. Hann sagði þetta var versta dæmið um barnamisþyrmingar sem hann hefði nokkru sinni séð. New York Post skýrir frá þessu.

„Það var fullt af mat í hlöðunni en bæði ísskápurinn og aðrir skápar voru læstir svo hungruð börnin gátu ekki fengið sér neitt að borða.“

Í hlöðunni voru þrír drengir, 1, 3 og 5 ára og 4 ára stúlka. Tvö elstu börnin voru læst inni í hundabúri sem var aðeins 0,9×0,9 metrar. Börnin voru fáklædd.

Lögreglan var kvödd á vettvang þegar foreldrar barnanna, þau Andrew Joseph Fabila og Paige Isabow Harkings, fóru að rífast. Þegar lögreglumenn voru að ræða við þau utan við hlöðuna heyrðu þeir í börnum inni í henni og könnuðu þeir þá ástand þeirra. Börnin voru strax flutt á sjúkrahús í Fort Worth og foreldrar þeirra voru handteknir og eiga þau ákæru yfir höfði sér fyrir fjórfaldar barnamisþyrmingar.