Ríkin hafa birt stefnu á hendur forsetanum og ríkisstjórn hans fyrir dómstóli í Kaliforníu. Ríkin segja að með því að lýsa yfir neyðarástandi misnoti Trump völd sín og brjóti því gegn stjórnarskrá landsins.
„Við stefnum Trump til að koma í veg fyrir að hann geti stolið skattfé frá okkur sem þingið hefur eyrnamerkt fólki í ríkjum okkar.“
Segir Xavier Bercerra, dómsmálaráðherra Kaliforníu, í yfirlýsingu. Hann hafði áður tilkynnt að Kalifornía myndi reyna að hnekkja ákvörðun Trump fyrir dómstólum því ríkið á á hættu að missa fé sem er eyrnamerkt verkefnum á vegum hersins, til neyðaraðstoðar og annarra verkefna.
Trump greip til þess ráðs á föstudaginn að lýsa yfir neyðarástandi á landamærunum við Mexíkó til að geta fjármagnað byggingu múrsins mikla sem hann hefur heitið að láta reisa á landamærunum. Þingið hefur ekki orðið við kröfum hans um að setja fé í verkefnið. Með því að lýsa yfir neyðarástandi hefur forsetinn nokkuð frjálsar hendur við að finna fé í ýmsum sjóðum ríkisins og setja það í verkefnið.
Auk Kaliforníu eru það Colorado, Cennecticut, Delaware, Hawaii, Illinois, Maine, Maryland, Michigan, Minnesota, Nevada, New Jersey, New Mexico, New York, Oregon og Virginia sem standa að málshöfðuninni.