Ferð hjóna í heita pottinn við heimili þeirra í Wheeling í Illinois í Bandaríkjunum á laugardag endaði með ósköpum. Það var síðdegis á laugardag að hjónin fóru í pottinn og höfðu þau áfengi við hönd. Ekki löngu síðar var eiginkonan látin og eiginmaðurinn kominn í handjárn.
Á upptökum úr öryggismyndavélum við lóðina má sjá þegar eiginkonan, hin 57 ára Laura, reynir að fara upp úr pottinum. Það virðist hafa gengið half brösulega því henni tókst ekki að komast upp og komst í sýnilegt uppnám í kjölfarið.
Eiginmaðurinn, hinn 58 ára gamli Eric, sést rétta henni hjálparhönd en skömmu síðar dregur hann lokið yfir pottinn á meðan Laura var ofan í. Ekki liggur fyrir hvers vegna Eric tók upp á þessu en eftir að hafa lokað pottinum gekk hann burt. Laura sést reyna að opna lokið í nokkra stund en án árangurs.
Um einni og hálfri klukkustund síðar snýr Eric aftur, opnar pottinn og sér þá eiginkonu sína fljótandi á hvolfi. Hann hafði samband við neyðarlínuna en þegar viðbragðsaðilar komu á vettvang var Laura látin.
Lögreglan í Wheeling segir ljóst að rekja megi atburðinn að einhverju leyti til áfengisneyslu hjónanna. „Áfengi og heitir pottar fara ekki saman.“ Eric hefur aldrei komist í kast við lögin og segir verjandi Erics að skjólstæðingur sinn sé niðurbrotinn vegna dauða eiginkonu sinnar.
