Roy og Bernita Rogers, frá Kansas City í Missouri í Bandaríkjunum, dreymdi um að eignast börn en hlutirnir gengu ekki fyrir sig eins og þau óskuðu sér.
Eftir nokkurra ára hjónaband hafði Bernita þrisvar sinnum misst fóstur. Þetta var að vonum mikið áfall en þau gáfu drauminn um barneignir ekki upp á bátinn.
Til að draga úr tómleikanum ákváðu þau að fá sér kött sem þau gætu beint ást sinni og hlýju að. Þau fengu sér fallegan svartan kettling sem fékk nafnið Midnight. Hann er ekki bara mikilvægur hluti af fjölskyldunni heldur var hann upphafið að yndislegum hlut.
Fljótlega eftir að Midnight kom til sögunnar varð Bernita barnshafandi og í þetta sinn tókst meðgangan vel og hún eignaðist yndislega stúlku sem var skírð Stacey. Midnight laðaðist strax að henni og Stacey kunni vel að meta köttinn.
Dag einn virtist Stacey vera lasin og fóru foreldrar hennar því með hana til læknis. Hann skoðaði hana og sagði þeim að hafa engar áhyggjur, hún væri bara kvefuð. Þegar heim var komið lögðu þau Stacey í rúmið sitt og kveiktu á hlustunartækinu í herberginu og fóru fram. Midnight var að vanda inni hjá Stacey.
Skömmu síðar heyrðu þau óvanalegt hljóð berast frá hlustunartækinu.
„Þetta var svona öskur-grátur. Þetta var hræðilegt og ég stökk upp úr stólnum og hljóp upp stigann.“
Sagði Bernita um það sem gerðist þennan dag.
Hjónin flýttu sér inn í herbergi Stacey og sáu þá strax að hún barðist við að ná andanum. Húð hennar var komin með bláan fölva. Þau óku strax með hana á slysadeild þar sem læknar tóku við henni og náðu að koma öndun hennar í lag. Hún jafnaði sig síðan en spurningin er hvernig þetta hefði endað ef Midnight hefði ekki öskrað og þannig gert foreldrunum viðvart um hvað var á seyði.
Hér fyrir neðan er hægt að sjá umfjöllunum þetta mál í spjallþætti Oprah Winfrey.
