Sean Milliken, sem vakti athygli í raunveruleikaþáttunum My 600lb Life, er látinn, 29 ára að aldri. Milliken lést á sjúkrahúsi á sunnudag í kjölfar sýkingar, að sögn föður hans.

Þættirnir sem um ræðir eru sýndir á TLC-sjónvarpsstöðinni í Bandaríkjunum og eru þáttaraðirnar orðnar sjö talsins. Milliken var í forgrunni í fjórðu þáttaröðinni og vakti saga hans talsverða athygli.

Eins og nafnið gefur til kynna er fylgst með fólki sem glímir við mikla ofþyngd. Þegar mest lét vó Milliekn rúm 400 kíló og var hann algjörlega ósjálfbjarga. Hann var búsettur á heimili móður sinnar í Kaliforníu sem sá um hann að mestu leyti. Móðir hans lést árið 2017.

Í þáttunum kom fram að Milliken hefði allta tíð verið of þungur. Hann hafi verið lagður í einelti í skóla og átt erfitt andlega í kjölfar skilnaðar foreldra sinna. Sagðist hann hafa sótt huggun í mat og áður en hann vissi af hafi hann misst stjórn á lífi sínu.

„Ég hélt aldrei að líf mitt yrði svona. Ég er fangi og ég verð að komast út,“ sagði Milliken og bætti við að hann vissi að líkami hans þyldi vart mikið meira álag. Ef hann léttist ekki myndi hann ekki lifa lengur en til þrítugs.

Í þáttunum kom einnig fram að Milliken vildi flytja til Houston til að gangast undir hjáveituaðgerð, en ekki liggur fyrir hvort hann hafi gengist undir hana, að sögn bandarískra fjölmiðla.