Ljósastaurar eru sannkallað þarfaþing í myrkrinu og létta fólki lífið enda ekki alltaf auðvelt að rata í kolniðamyrki. Það getur því verið erfitt þegar ljósastaurarnir virka ekki.

Febrúar er einn af dimmustu mánuðum ársins og íbúarnir í litla bænum Serridslev á Jótlandi í Danmörku fengu svo sannarlega að kynnast myrkrinu í tvær vikur nú í mánuðinum. Ljósastaurarnir virtust bara ekki virka, að minnsta kosti var ekki ljóstýra á þeim í þessar tvær vikur. Þetta var að vonum umræðuefni bæjarbúa þegar þeir hittust á förnum vegi og þeir létu starfsmenn sveitarfélagsins ítrekað vita af þessu.

Nú er skýringin á þessu hins vegar komin fram í dagsljósið. Staurarnir voru alls ekki bilaðir heldur hafði rafmagnsreikningurinn ekki verið greiddur á tilsettum tíma.

Þegar sveitarfélagið fór að kanna málið kom í ljós að í kjölfar endurnýjunar á ljósastaurunum í bænum var rafmagnsreikningurinn sendur til einkaaðila en ekki sveitarfélagsins. Eins og gefur að skilja hafði móttakandi reikningsins ekki mikinn áhuga á að greiða fyrir rafmagnsnotkun ljósastaura í bænum enda kostnaðurinn meiri en nemur rafmagnsnotkun venjulegs heimilis.

Nú er búið að leysa málið, greiða reikninginn, breyta nafni þess sem á að fá reikninginn og kveikja á ljósastaurunum.