Á undanförnum tíu árum hefur dönsku lögreglunni ekki tekist að leysa 88 morðmál. Þetta kallar nú á ný viðbrögð lögreglunnar og hefur ríkislögreglustjórinn í hyggju að setja nýja miðlæga stoðdeild á laggirnar sem verði lögreglu um allt land til aðstoðar við rannsókn flókinna morðmála en muni aðallega annast þjálfun, menntun og annað er getur gagnast rannsóknarlögreglumönnum víða um land.

Í Danmörku er það lögreglan í hverju umdæmi sem fer með rannsókn morðmála eins og annarra mála. Umdæmin eru misjafnlega í stakk búin til að takast á við þessar rannsóknir enda misjafnt hversu mörg morð eru framin í hverju umdæmi árlega. Víða skortir því á reynslu og þjálfun lögreglumanna í rannsóknum flókinna morðmála.

Flest morðmálin eru ekki svo flókin, þar koma vímuefni, fjölskyldubönd og deilur kunnugra oft við sögu. Erfiðust málin eru hins vegar þau þar sem engin tengsl eru á milli morðingjans og hins látna. Það eru einnig málin sem fá mesta athygli almennings.

Í tveimur óleystum morðmálum, sem hafa vakið mikla athygli almennings, hefur ríkislögreglustjórinn sett sérstaka rýnihópa á laggirnar til að fara yfir öll gögn málanna til að kanna hvort lögreglunni hafi yfirsést eitthvað.