Þegar leikskólabarn í Kolding á Jótlandi í Danmörku var svangt í nóvember vildi leikskólakennari koma því til aðstoðar. Hann fór að fataskáp barnsins til að sækja nestisbox þess. En í stað þess að finna nestisboxið í tösku barnsins fann hann poka. Þegar hann kíkti í pokann trúði hann ekki eigin augum.

Í pokanum voru rúmlega 3,6 kíló af hassi. Að vonum var hringt í lögregluna sem kom skjótt á vettvang. Faðir barnsins var staddur á leikskólanum þegar þetta átti sér stað en hann var á fundi þar. Hann var handtekinn og við leit á honum fundust 80 grömm af kókaíni.

Þetta kom fram fyrir dómi í Kolding í gær þegar málið var tekið fyrir. Faðirinn, sem er fertugur, játaði sök og var hann dæmdur í eins árs og níu mánaða fangelsi.

Saksóknari var sáttur við niðurstöðuna en hann hafði krafist eins árs og níu mánaða fangelsis yfir manninum.

BT segir að maðurinn hafi sætt sig við dóminn og ætli ekki að áfrýja honum. Hann var fluttur beint í afplánun.