Boeing 737-farþegaþota Ethiopian Airlines brotlenti í morgun þegar hún var á leið frá Addis Ababa í Eþíópíu til Nairobi í Kenía.
Um borð voru 149 farþegar og átta manna áhöfn, að því er Reuters greinir frá. Abiy Ahmed, forsætisráðherra Eþíópíu, vottaði aðstandendum þeirra sem um borð voru samúð sína.
Ekki hefur verið greint frá því hvar þotan brotlenti eða hvort einhverjir hafi hugsanlega komist lífs af.
Frétt uppfærð kl. 08.46:
Upplýsingafulltrúi flugfélagsins segir að slysið hafi orðið klukkan 08.44 að staðartíma og brotlenti vélin skömmu eftir flugtak frá flugvellinum í Addis Ababa.
Frétt uppfærð kl. 10.10
Flugfélagið segir í yfirlýsingu að viðbragðsaðilar séu á vettvangi slyssins sem varð skammt frá bænum Bishoftu, um 60 kílómetra suðaustur af höfuðborginni. Ekki liggur fyrir hvort einhver hafi komist lífs af úr slysinu eða hver orsök slyssins voru. Ethiopean Airlines er vinsælt flugfélag í Afríku enda flýgur það til margra áfangastaða innan álfunnar. Slys eða flugatvik hafa ekki verið algeng en þó er þess getið í frétt BBC að árið 2010 hafi vél félagsins farist með þeim afleiðingum að 90 létust.