Það er stirt samband á milli stjórnvalda í Venesúela og Kólumbíu þessa dagana. Ástandið í Venesúela er allt annað en gott en algjört hörmungarástand ríkir í efnahagsmálum landsins og staðan er mjög erfið í pólitíkinni þar sem stjórnarandstaðan reynir að koma Nicolas Maduro, forseta, frá völdum en hann situr sem fastast, enn sem komið er.

Stjórnvöld í Kólumbíu styðja stjórnarandstöðuna og það fer illa í Maduro sem lokaði nýlega landamærunum að Kólumbíu. Þetta hefur mikil áhrif á um 3.000 börn sem sækja skóla í Kólumbíu og þurfa að fara yfir landamærin til þess.

Foreldrum barnanna hefur tekist að koma þeim í skóla í Kólumbíu en þeir telja skólakerfið þar mun betra en í heimalandinu. Nú neyðast börnin til að fara ólöglega yfir landamærin daglega til að geta mætt í skóla.

Börnin fara venjulega gangandi yfir tvær brýr sem tengja löndin en þeim hefur nú verið lokað til að koma í veg fyrir að neyðaraðstoð komist til landsins en Maduro vill ekki fá hana þar sem hann segir að engin neyð ríki í landinu.

Börnin fara því nú yfir ána Táchira, sem skilur löndin að, á heimagerðum flekum til að komast í skóla. Foreldrar þeirra fylgja þeim niður að ánni daglega og sjá til þess að þau komist heilu og höldnu yfir hana.