Síðdegis á mánudag í síðustu viku kom til deilna um bifreiðastæði við stórmarkað Sainsbury‘s í Pontllanfraith í Wales. Svo virðist sem deilurnar hafi endað með að Christopher Gadd, 48 ára, var myrtur. Sá sem grunaður er um morðið ók á hann á Land Rover bifreið sinni. Börn og fullorðnir urðu vitni að þessu.

Gadd, sem var heyrnarlaus, var úrskurðaður látinn á vettvangi. 21 árs karlmaður var handtekinn grunaður um að hafa ekið vísvitandi á Gadd. Hann hefur verið úrskurðaður í gæsluvarðhald.

Sky skýrir frá þessu. Fram kemur að Gadd hafi farið út í búð til að kaupa fisk og fleira en hafi ekki komið aftur heim.

Lögreglan segir að tilkynnt hafi verið að Land Rover hafi verið ekið á gangandi vegfarand um klukkan 16. Rannsókn standi yfir á málinu og hefur hún hvatt vitni til að gefa sig fram.