Á undanförnum árum hafa borist fregnir af veru mörg hundruð rússneskra málaliða í Sýrlandi, Venesúela og Mið-Afríkulýðveldinu. Þetta hefur að vonum vakið athygli á Vesturlöndum enda hafa margir áhyggjur af auknum umsvifum Rússa víða um heim. Nú berast fregnir af veru rússneskra málaliða í Líbíu og er það til að auka enn frekar á áhyggjur margra.

Rússar eru ekkert að auglýsa þessi umsvif sín í Líbíu eða öðrum ríkjum en þeir nýta sér ástandið á þessum átakasvæðum til að koma sér upp góðum samböndum og auka áhrif sín.

The Times og The Telegraph segja að samkvæmt mati vestrænna leyniþjónusta hafi 300 rússneskir málaliðar verið sendir til Líbíu til að styðja Khalifa Haftar, leiðtoga Libyan National Army. Þeir eru sagðir aðstoða við að útvega vopn, skotfæri, dróna og sjá um ýmislegt er varðar aðdrætti nauðsynja. Nú eru átta ár síðan Vesturlönd hófu hernað í Líbíu en hann endaði með því að Muammar Gaddafi, sem réði lögum og lofum í landinu áratugum saman, dó. En ástandið í landinu er enn mjög óstöðugt og mikill óróleiki er þar.

Ríkisstjórn, sem nýtur stuðnings Sameinuðu þjóðanna, er við völd og heldur til í höfuðborginni Trípólí. Hersveitir fyrrnefnds Khalifa Haftar ráða hins vegar lofum og lögum í austurhluta landsins. Vesturlönd óttast að ef áhrif Rússa í landinu aukast þá geti ástandið versnað enn frekar og haft afleiðingar á straum flóttamanna til Evrópu sem og flæði olíu til álfunnar.