Undirtegundin er einfaldlega nefnd Tegund D. Fram að þessu hafði aðeins verið vitað um dýr af þessari tegund eftir að 17 dýr þessarar tegundar strönduðu á Nýja-Sjálandi fyrir 64 árum. Einnig höfðu ferðamenn tekið nokkrar ljósmyndir af dýrum þessarar tegundar og sjómenn höfðu sögur að segja af þeim.
En nú hafa vísindamenn sem sagt nýjar myndbandsupptökur af dýrum þessarar tegundar og lífsýni úr þeim. Verið er að vinna að erfðafræðilegum rannsóknum á lífsýnunum og bíða margir spenntir eftir niðurstöðunum.
Í fréttatilkynningu frá NOAA, bandarísku hafrannsóknarstofnunni, er haft eftir Bob Pitman að háhyrningar þessarar tegundar séu hugsanlega stærsta dýrið, sem enn hefur ekki verið flokkað og skráð sérstaklega, á jörðinni. Þetta sýni vel hversu lítið við vitum um lífið í sjónum.
Vísindamennirnir mynduðu hóp háhyrninga af Tegund D undan ströndum Chile og náðu lífsýnum úr þeim. Dýr af þessari tegund eru frábrugðin „venjulegum“ háhyrningum að því leiti að höfuð þeirra eru ávalari og bakuggar þeirra eru minni og oddmjórri. Hvíti bletturinn við augu þeirra er miklu minni en á öðrum háhyrningum.