Tollverðir í New York og New Jersey lögðu á dögunum hald á stærstu fíkniefnasendingu síðustu 25 ára. Um var að ræða 1.450 kíló af kókaíni en sendingin var stöðvuð á hafnarsvæðinu í New York/Newark.
Talið er að götuverðmæti efnanna nemi 9,3 milljörðum króna. Þetta er stærsta einstaka fíkniefnasendingin sem tollverðir á svæðinu hafa lagt hald á frá árinu 1994.
Í frétt AP kemur fram að sendingin hafi verið um borð í skipi sem var að koma frá Buenaventura í Kólumbíu. Samkvæmt tollskýrslum átti skipið að innihalda þurrkaða ávexti.
Lögregluyfirvöld í New York segja að sendingin renni stoðum undir það að eftirspurn eftir kókaíni fari aftur vaxandi í Bandaríkjunum.