Eftir að hafa séð klámmyndir á netinu varð fertug bresk móðir, Sarah, öskureið en henni fannst myndirnar ofbeldisfullar og byggjast á nauðgunum. Hún er því nú, í samstarfi við fjórar aðrar mæður, að framleiða klámmynd sem þær ætla að sýna börnum sínum sem öll eru á unglingsaldri.

„Ef þetta hefði verið í fyrsta sinn sem ég sá eitthvað um kynlíf þá hefði ég verið skíthrædd. Mér fannst skyndilega að ég þyrfti að æla. Við verðum að sýna börnunum að það er eitthvað annað til en þessi hryllingur á netinu. Ef sonur minn kæmi svona fram við konu myndi ég rassskella hann.“

Þetta sagði hún við Mirror eftir að hafa horft á klám sem er aðgengilegt á netinu án greiðslu.

Önnur móðir, Sarah Louise sem á sex börn, varð líkamlega veik eftir að hafa séð klámefnið og sú þriðja hætti þátttöku í verkefninu því henni var svo illa brugðið við það sem hún sá. Verkefnið er á vegum Channel 4 sjónvarpsstöðvarinnar sem er að framleiða þáttaröð sem heitir „Mums Make Porn“ eða Mæður búa til klám.

Konurnar munu framleiða eigin 12 mínútna klámmyndir sem þeim finnst gefa raunsanna mynd af kynlífi. Unglingsbörn þeirra fá síðan að sjá þessar myndir. Konurnar telja að myndirnar þeirra sendi jákvæð skilaboð um ástarsambönd og kynlíf. Þær koma að öllum stigum framleiðslunnar, gerð handrits, vali á leikurum og öðru. Þeim til aðstoðar eru sérfræðingar úr klámiðnaðinum.