Danska og pólska lögreglan handtóku í gær sjö menn sem eru grunaðir um að vera félagar í stórum smyglhring. Smyglararnir eru taldir hafa reynt að smygla um 16 milljónum sígaretta til Danmerkur frá Póllandi.

Um er að ræða ólöglega framleiddar sígarettur sem líkjast þekktum sígarettumerkjum. Í fréttatilkynningu frá dönsku lögreglunni kemur fram að ef þessar sígarettur hefðu komist á danskan markað hefði tekjutap ríkisins verið sem nemur 270 til 360 milljónum íslenskra króna.

Hinir handteknu eru á aldrinum 42 til 54 ára. Þeir verða færðir fyrir dómara þar sem gæsluvarðhalds verður krafist yfir þeim.