Sænski hægrisinnaði þjóðernisflokkurinn Alternativ for Sverige mun um næstu helgi standa fyrir ráðstefnu á Amager í Kaupmannahöfn til að hefja undirbúning kosningabaráttunnar fyrir Evrópuþingskosningarnar sem eru í maí. Það skýtur auðvitað skökku við að sænskur stjórnmálaflokkur haldi ráðstefnu utan Svíþjóðar en ástæðan er að flokkurinn er ekki velkominn í heimalandinu.

Danska ríkisútvarpið skýrir frá þessu. Flokkurinn fékk 0,3 prósent atkvæða í þingkosningunum á síðasta ári en vonast til að fá nægilegt fylgi til að koma þingmanni á Evrópuþingið.

Haft er eftir formanni flokksins, Gustav Kasselstrand, að flokkurinn sé hvergi velkominn í Svíþjóð og því verði ráðstefnan haldin í Danmörku. Hann sagði að sænskir ráðstefnustaðir hafi hafnað því að leigja flokknum aðstöðu til fundahalda eða hafi einfaldlega afturkallað pantanir þegar „vinstrisinnaðir fjölmiðlar“ byrjuðu að fjalla um málið.

„Mér finnst ég að vissu leyti vera velkomnari í Danmörku en í Svíþjóð.“

Sagði formaðurinn sem reiknar með um 200 manns á ráðstefnuna.

Á stefnuskrá flokksins er að hætta að taka við flóttamönnum. Flokkurinn segir bein tengsl á milli innflytjenda og afbrota í Svíþjóð, hryðjuverka og hruns velferðarkerfisins. Kasselstrand þvertekur þó fyrir að flokkurinn sé öfgahægriflokkur.