Lögreglunni í Boston grunar að 82 ára gamall fyrrverandi mafíósi, Robert Gentile, hafi verið viðriðinn eitt bíræfnasta rán í sögu borgarinnar.
Þannig er mál með vexti að hópur manna ruddist inn á Isabella Stewart Gardner-safnið í Boston snemma morguns þann 18. mars árið 1990. Mennirnir yfirbuguðu öryggisverði á safninu og bundu þá áður en þeir létu til skarar skríða. Alls höfðu ræningjarnir 13 ómetanleg listaverk á brott með sér, þar á meðal verk eftir Vermeer og Rembrandt. Talið er að heildarverðmæti verkanna hafi numið um hálfum milljarði Bandaríkjadala.
Málið hefur lengi verið eitt stærsta óleysta sakamál borgarinnar – og þótt víðar væri leitað. Rannsókn lögreglu leiddi þó til þess að árið 2016 var gerð húsleit hjá fyrrnefndum Robert Gentile vegna gruns um að hann hefði verið viðriðinn málið. Sjálfur neitaði hann að hafa átt aðild að ráninu en hann var engu að síður dæmdur fyrir fíkniefna- og vopnalagabrot.
Robert lýkur afplánun þess dóms á sunnudag, þann 17. mars, en á meðan á fangelsisdvöl hans hefur staðið hefur lögregla reynt að fá upp úr honum hvar verkin úr ráninu árið 1990 eru niður komin. Lögregla er nokkuð viss í sinni sök en sjálfur hefur Robert neitað að ræða við málið lögreglu.
Gentile er sem fyrr segir orðinn 82 ára og er hann heilsuveill. Lögreglu grunar ekki að Robert hafi sjálfur staðið á bak við ránið heldur haft aðkomu að því að koma þeim í verð. Hann viti því hvar verkin eru niðurkomin. Tveir menn sem lögregla grunar að hafi verið höfuðpaurar í málinu eru nú látnir.